Vrau të dashurën dhe i vuri flakën shtëpisë, Ilirjan Selmani lihet në burg

Ilirjan Selmani, 31 vjeç, është arrestuar dhe është dërguar në burg pas vrasjes së partneres së tij 52-vjeçare, Kozeta Teço, në Pogradec. Pas krimit, ai i vuri flakën banesës së viktimës për të fshehur gjurmët.

Gjatë marrjes në pyetje, Selmani pranoi disa episode, por mohoi se e kishte kryer vetë vrasjen. Megjithatë, policia dhe prokuroria e Korçës kanë mbledhur prova të forta që tregojnë se ai ka kryer krimin dhe më pas është larguar nga vendi i ngjarjes.

Hetimet zbulojnë se mbrëmjen e ngjarjes, Selmani ndodhej në shtëpinë e Teços, me të cilën kishte një marrëdhënie prej disa vitesh. Një grindje e çastit mes tyre degjeneroi në dhunë fizike dhe përfundoi tragjikisht me vrasjen e partneres dhe djegien e banesës.

Autoritetet nënvizojnë se Selmani ishte i njohur si përdorues narkotikësh dhe kishte shfaqur simptoma depresioni, ndërsa edhe viktima kishte pasur probleme të shëndetit mendor kohët e fundit.