Vrasja e oficerit të ri në Fier, reagon publikisht ish-kreu i Policisë Gledis Nano

Ish-kreu i Policisë së Shtetit, Gledis Nano ka reaguar për vrasjen  e efektivit të “Shqiponjave”, Novruz Cenalia pas një sherri banal për parakalimin. Në një postim në Facebook, Nano shprehet se kjo tragjedi shërben si këmbanë alarmi për rreziqet që po përballen çdo ditë efektivët e rendit.

Më tej, ish-kreu i Policisë së Shtetit shprehet se çdo efektiv meriton të kthehet në shtëpi, shëndoshë e mirë.

“Tragjedia e fundit në fshatin Baltëz të Fierit shërben si kujtesë e fortë e rreziqeve me të cilat përballen çdo ditë efektivët e rendit. Një punonjës policie i forcave “Shqiponja” humbi jetën, duke lënë pas një familje të pikëlluar, kolegë dhe një komunitet në zi.

Çdo anëtar i këtij komuniteti meriton të ndihet i sigurt dhe çdo oficer meriton të kthehet në shtëpi.

Ngjarje si kjo japin shembull për të rritur ndërgjegjësimin për sfidat me të cilat përballet forca policore dhe rëndësinë e sigurimit të burimeve dhe mbështetjes që u nevojiten për të mbrojtur dhe për t'i shërbyer komunitetit tonë në mënyrë efektive.

Në solidaritet për sakrificat e të gjithë Shqiponjave.

RIP Novruz Cenalia”