Vajrat e përziera i shisnin për vaj ulliri bio në rrjetet sociale, arrestohet babai në Berat dhe shpallet në kërkim i biri

Një 56-vjeçar është arrestuar në Berat, ndërsa i biri është shpallur në kërkim pasi akuzohen për ‘Fshehje e të ardhurave’ dhe ‘Mashtrim me produktet ushqimore’

Në pranga ka rënë shtetasi A.A 56-vjeç për veprat penale ‘Fshehja e të ardhurave’ dhe ‘Mashtrim me produktet ushqimore’ kryer në bashkëpunim në më shumë se një herë, ndërsa u shpall në kërkim i biri, shtetasi D.A. 29-vjeç.

Nga hetimet ka rezultuar se të dy shtetasit, babë e bir në bashkëpunim me njëri-tjetrin kthyen banesën në ambient për përzierjen e vajrave të ndryshëm me produkte ende të panjohura, duke i shitur nëpërmjet rrjeteve sociale si vaj ulliri bio.

Nga veprimet e para hetimore u sekuestuan rreth 3000 litra lëndë vajore e papërcaktuar, 1000 litra e dyshuar vaj kikiriku, një laptop dhe printeri me të cilin printoheshin etiketat postare si dhe 2 900 000 lekë dhe 1800€ të dyshuara të përfituara nga kjo veprimtari e kundraligjshme.