U gjet e pajetë në banesën e djegur, 52-vjeçarja në Pogradec dyshohet se është vrarë

Një ngjarje e rëndë ka tronditur banorët e lagjes 1 në Pogradec, ku sot në mëngjes u gjet e pajetë në banesën e saj Kozeta Teço, 52-vjeçare, në një objekt që kishte marrë flakë. Hetimet paraprake nga grupi hetimor tregojnë se zjarri në banesë dyshohet të jetë i qëllimshëm dhe ngjarja po trajtohet si vrasje me paramendim.

Ekspertët mjeko-ligjorë kanë konstatuar shenja të jashtme dhune në trupin e viktimës, çka forcon pistën e dyshuar për ngjarje kriminale. Sipas burimeve nga policia, një nga arsyet që po hetohet me prioritet është konflikti për motive pronësie.

Në vendngjarje janë sekuestruar kamerat e sigurisë nga dy objekte pranë banesës së viktimës, të cilat pritet të hetojnë lëvizjet para dhe pas ngjarjes. Gjithashtu, janë shoqëruar disa persona në komisariatin e policisë së Pogradecit, të cilët po merren në pyetje lidhur me ngjarjen.

Policia vijon hetimet për zbardhjen e plotë të rrethanave, duke përfshirë edhe ekzaminimin e provave materiale dhe dëshmitë nga banorët e zonës. Rasti ka tronditur komunitetin lokal, ndërsa autoritetet bëjnë thirrje për durim dhe bashkëpunim në procesin e zbardhjes së vrasjes së dyshuar.