U asfiksuan nga rrjedhja e gazit në shtëpi, viktimat u gjendën nga familjarët

Dy persona kanë mbetur të vdekur në rrugën “Marije Kraja” pas rrjedhjes së gazit në shtëpinë e tyre. Bëhet fjalë për pronarin e shtëpisë 47 vjeçari Altin Maksuti 56 vjeçari Vladimir Bengu, të cilët u asfiksuan pas një rrjedhje gazi në banesë.

Altin Maksuti banon në Greqi dhe kishte shkuar në banesën e tij së bashku me 56 vjeçarin për të bërë disa riparime në shtëpi.

Familjarët  e tyre kanë denoncuar në polici të shqetësuar pasi dy shtetasit nuk i përgjigjeshin thirrjeve në telefon. Policia ka shkuar në banesë dhe i ka gjetur të pajetë ndërsa ngrohësja nga e cila dyshohet se ka ardhur rrjedhja e gazit, ishte e ndezur.

Ende nuk dihet nëse këta persona kanë ndërruar jetë dje apo sot teksa dyshohet se kanë qenë në gjumë dhe nuk kanë arritur të nuhasin aromën e gazit.

Njoftimi i policisë:
Më datë 19.12.2024, rreth orës 17:20, në rrugën “Marije Kraja”, dyshohet se janë asfiksuar nga rrjedhja e gazit, pronari i banesës, shtetasi A.M, rreth 47 vjeç dhe një afërm i tij i largët shtetasi V.B, rreth 56 vjeç, të cilët kanë humbur jetën sipas konfirmimit të stafit mjekësor.

Grupi hetimor nën drejtimin e Prokurorisë po punon për sqarimin e rrethanave dhe dokumentimin e plotë ligjor të ngjarjes.