Aksident i rëndë në Lezhë, ‘audi’ përplas për vdekje 12-vjeçarin që po lëvizte me monopatinë

Një aksident tragjik ka ndodhur mbrëmjen e sotme në superstradën Lezhë–Shkodër, pranë aksit që lidh zonën e Fishtës me rrugën kryesore.

Një automjet tip “Audi” ka përplasur një 12-vjeçar, i cili po lëvizte me një minipatine. Përplasja ka qenë e fortë dhe, pavarësisht ndërhyrjes së menjëhershme dhe transportimit drejt spitalit, i mituri ka humbur jetën gjatë rrugës.

Pas përplasjes, drejtuesi i “Audit” ka humbur kontrollin e automjetit, i cili ka dalë nga rruga dhe ka përfunduar në kanal.

Lezhë/Informacion paraprak

Rreth orës 20:10, në aksin e vjetër rrugor Blinisht–Fishtë, në fshatin Fishtë, automjeti me drejtues shtetasin E. K., rreth 33 vjeç, ka aksidentuar një të mitur, rreth 13 vjeç, i cili lëvizte me monopatinë. Si pasojë e përplasjes, i mituri ka ndërruar jetë.

Shtetasi E. K. është shoqëruar në Komisariat për kryerjen e veprimeve të mëtejshme procedurale.

Grupi hetimor ndodhet në vendngjarje dhe po punon për dokumentimin e plotë të ngjarjes dhe zbardhjen e rrethanave të aksidentit.