Situata e Covid-19, stafet mjekësore në qendrat verore nisin trajnim të veçantë

Ditën e sotme, ministrja e Shëndetësisë dhe Mbrojtjes Sociale Ogerta Manastirliu, ka ndjekur nga afër trajnimin e stafeve mjekësore që do të punojnë në qendrën shëndetësore verore në Shëngjin. Në fjalën e saj, Manastirliu ka bërë me dije 29 qendrat do të jenë gati për të ofruar shërbim 24 orë në 7 ditë të javës, duke filluar nga 15 qershori.

“E kemi nisur nga Lezha trajnimin e grupeve dhe stafeve tona, përsa i përket ndihmës së shpejtë. Duke shtuar dhe faktin që në këtë vit do të kemi edhe një shërbim të shtuar në gjithë qendrat shëndetësore verore, që është testimi i shpejtë. Ndaj dhe është duke u realizuar trajnimi, qoftë përsa i përket ndihmës së parë në këto struktura por edhe testimit të shpejtë anticovid.

Padyshim që përfshirja e testit të shpejtë brenda strukturave të qendrave shëndetësore vjen si një shërbim i shtuar, që do t’i vlejë shumë qoftë kapjes së hershme të rasteve me Covid, qoftë izolimit të tyre. Dhe do t’i vlejë shumë edhe sistemit të survejancës që tashmë funksionon në të gjithë territorin. Ndaj edhe furnizimi me teste të rapidit duhet të vazhdojë të funksionojë përgjatë gjithë kohës.

Fakti që jemi duke lehtësuar masat për sezonin turistik, por edhe për faktin që pandemia tashmë është në nivele të kontrolluara nuk do të thotë të ulim vigjilencën dhe të mos respektojmë protokollet, të cilat ende janë në funksion dhe për t’u zbatuar nga të gjithë qytetarët dhe gjithashtu rekomandohet që të jemi shumë të kujdesshëm në zbatimin e protokolleve, qoftë sa i përket protokollit të plazheve, qoftë protokollit në bare, restorante, për të  mos lejuar përhapjen e infeksionit. Pra për ta patur nën kontroll, do duhet që të jemi shumë të kujdeshsëm dhe vigjilentë”, tha ajo.