Shpërthimi i bombolës së gazit vrau 50-vjeçarin, reagon policia: Dyshohet për lëndë plasëse

Policia jep detajet e para nga ngjarja e rëndë në Selenicë, ku një 50-vjeçar mbeti i vrarë nga shpërthimi i një bombole gazi. Policia sqaron se ngjarja ka ndodhur jashtë ambienteve të shtëpisë dhe forcat xheniere po sqarojnë rrethanat e plota të ngjarjes.

Selenicë, Vlorë/Informacion shtesë

 Në lidhje me informacionin paraprak të dhënë mëngjesin e sotëm, sipas të cilit, një shtetas njoftoi sallën operative të DVP Vlorë, se në banesën e fqinjit të tij, shtetasit D. G., kishte shpërthyer një bombol gazi dhe si pasojë e shpërthimit, shtetasi D. G. humbi jetën, gjatë rrugës për në spital, ju informojmë se:

 Nga veprimet paraprake hetimore të kryera nga grupi i posaçëm hetimor, rezulton se vendi i kësaj ngjarjeje nuk është brenda banesës së shtetasit D. G., por në territorin e jashtëm të banesës së këtij shtetasi.

Grupi hetimor dhe ekspertët xhenierë, në drejtimin e Prokurorisë, vijojnë punën intensive për zbardhjen e rrethanave të kësaj ngjarjeje, për të përcaktuar çfarë ka shpërthyer, si dhe për të përcaktuar shkakun e shpërthimit. Në vijim do të informoheni për më shumë detaje mbi këtë ngjarje.