Shpërndanin kanabis me doza, arrestohen 3 persona në Vlorë

Tre persona janë arrestuar nga policia e Vlorës ndërsa një tjetër është shpallur në kërkim pasi shpërndanin kanabis me doza në zona të ndryshme të qytetit.

Në kuadër të operacionit të koduar “Ndalesa” u vunë në pranga shtetasit E. Q., 22 vjeç, banues në lagjen “Pavarësia”; B. K., 48 vjeç, banues në lagjen “Pavarësia” dhe R. H., 43 vjeç, banues në lagjen “Isa Boletini”. Gjithashtu, u shpall në kërkim shtetasi D. M., 28 vjeç, banues në lagjen “Pavarësia 2”.

Këta shtetas dyshohen se vepronin si grup, duke siguruar lëndën narkotike, të cilën më pas e ndanin në doza dhe e shpërndanin për shitje në qytetin e Vlorës.

Gjatë kontrollit të ushtruar ndaj këtyre shtetasve dhe në banesat e tyre, shërbimet e Policisë gjetën dhe sekuestruan disa doza me lëndë narkotike kanabis, një peshore elektronike të dyshuar për peshimin e lëndëve narkotike dhe 3 aparate celulare të përdorura për aktivitetin kriminal.