Shiste kanabis me doza në qytet, arrestohet 31-vjeçari në Kuçovë

Pas disa javësh hetimesh të ndjekura me metoda proaktive, Policia e Beratit në bashkëpunim me Prokurorinë dhe Forcën e Posaçme Operacionale finalizoi operacionin antidrogë të koduar “Qyteti”.

Si rezultat u arrestua shtetasi E. M., 31 vjeç, banues në Kuçovë, i dyshuar për shpërndarje të lëndëve narkotike në zona të ndryshme të qytetit. Hetimet treguan se ai siguronte kanabis, e ndante në doza dhe e shiste.

Gjatë kontrollit në banesë dhe në automjetin e tij, u gjetën sasi kanabisi në formë boçesh dhe doza të gatshme për shitje, 5 peshore elektronike, si dhe para të dyshuara të ardhura nga aktiviteti kriminal: 175 mijë lekë, 1060 euro dhe valuta të tjera.

Materialet iu referuan Prokurorisë së Rrethit Gjyqësor Berat për veprime të mëtejshme ligjore.