Rama ndan pamje nga Saranda dhe Ksamili: Turistët po rikthehen, brigjet e Jonit janë dashuri me shikim të parë

Kryeministri Edi Rama ka ndarë sot një mesazh optimist për ecurinë e sezonit turistik në jug të vendit, duke publikuar pamje nga Saranda dhe Ksamili. Ai thekson se turistët e huaj po zgjedhin gjithnjë e më shumë bregdetin shqiptar si destinacion pushimesh.

“Turistë nga gjithë bota po shijojnë këto ditë detin e mrekullueshëm, mikpritjen dhe plazhet publike të Sarandës dhe Ksamilit,” shkruan Rama në Facebook. Ai shton se një pjesë e vizitorëve janë kthyer sërish në Shqipëri, ndërsa të tjerët janë të bindur që do të rikthehen.

Sipas kreut të qeverisë, bregdeti i Jonit ofron një përvojë që mbetet gjatë në kujtesë: “Brigjet e Jonit janë joshje me shikim të parë dhe e përjetshme.”

Postimi i Ramës vjen në një kohë kur sektori i turizmit po përpiqet të përballojë sfidat e zjarreve dhe të temperaturave ekstreme që kanë prekur disa zona në jug të vendit.