Sherr për linjën e ujit të pallatit/ 35-vjeçari pla'gosi administratorin, arrestohet nga policia

Një konflikt për linjën e ujit të pijshëm në një pallat në Tiranë ka përfunduar me plagosjen e rëndë të administratorit të objektit.

Ngjarja ka ndodhur mëngjesin e sotëm në një pallat në rrugën “Aleksandri i Madh”. Sipas Policisë, 35-vjeçari me inicialet K. L., banor i pallatit, dyshohet se ka plagosur me mjete prerëse administratorin, F. G., 74 vjeç.

Policia bën me dije se shërbimet e Komisariatit Nr. 6 kanë shkuar menjëherë në vendngjarje, pas njoftimit për personin e plagosur, ndërsa autori i dyshuar është identifikuar dhe arrestuar pak pas ngjarjes.

Gjatë ndërhyrjes, policia ka sekuestruar një thikë dhe një motorsharrë, të dyshuara si mjete të përdorura në ngjarje.

74-vjeçari është transportuar në spital dhe ndodhet nën kujdesin e mjekëve.

Ndërkohë, materialet procedurale i janë referuar Prokurorisë, e cila do të vijojë hetimet për zbardhjen e plotë të rrethanave të rastit.