Përfundon në spital polici që dhunoi kamarierin, dhunohet nga pronarët e hotelit

Një incident i rëndë është shënuar në qytetin e Vlorës, në zonën e Skelës, ku një oficer policie ka ushtruar dhunë fizike ndaj një kamarieri të ri gjatë orarit të punës. Ngjarja ka ndodhur ditën e djeshme dhe ka eskaluar shpejt në një konflikt më të madh.

Sipas burimeve nga vendngjarja, pas dhunës ndaj kamarierit, polici është përballur me pronarët e hotelit ku ndodhi incidenti. Ata nuk kanë qëndruar pasivë dhe i janë përgjigjur dhunës me dhunë, duke e goditur efektivin në kokë, fytyrë dhe shpatull.

Polici ka përfunduar në spital, në repartin e reanimacionit, por fatmirësisht ndodhet jashtë rrezikut për jetën. Ende nuk dihen rrethanat e plota që çuan në përplasjen fillestare, ndërsa policia po heton për të zbardhur konfliktin dhe për të përcaktuar përgjegjësitë përkatëse.