Operacione nga ajri dhe toka për zjarret në Bulqizë, banorët në ankth: “Jemi gjithë natën pa gjumë”

Situata nga zjarret në qarkun e Dibrës mbetet kritike. Në Bulqizë, forcat zjarrfikëse dhe ato të armatosura kanë vijuar ndërhyrjet edhe gjatë natës dhe mëngjesit të sotëm për të shuar vatrat e zjarrit që ende janë aktive, megjithëse në përmasa më të vogla.

Banorët e zonës janë në alarm. “Jemi gjitha natën pa gjumë, mos riaktivizohet,” thotë Ibrahim Spahiu, shtëpia e të cilit u rrethua nga flakët të shtunën pasdite, por fatmirësisht shpëtoi. “Na thanë dilni nga shtëpia… si ta lija shtëpinë që kam punuar një jetë?!”, shton ai, i tronditur nga përmasat e zjarrit që, sipas banorëve, janë më të mëdhatë që kanë parë ndonjëherë.

Operacionet e shuarjes po zhvillohen nga ajri dhe toka, me mbështetjen e strukturave të emergjencës, për të frenuar përhapjen e zjarreve dhe për të mbrojtur banesat. Rreziku i riaktivizimit mbetet ende i lartë për shkak të erërave dhe temperaturave të larta.