Parkuan mbi trotuar duke bllokuar kalimin, procedohen penalisht dy shoferë në Kukës

Dy drejtues automjetesh në Kukës janë proceduar penalisht pasi parkuan mjetet e tyre në mënyrë të paligjshme, duke bllokuar trotuaret dhe penguar qarkullimin e lirë të këmbësorëve dhe mjeteve të tjera.

Gjatë kontrolleve të ushtruara nga Policia Rrugore e DVP Kukës, në bashkëpunim me Komisariatin lokal, u konstatuan dy automjete të parkuara mbi trotuar në zona të ndryshme të qytetit, çka kishte sjellë vështirësi të dukshme për lëvizjen e qytetarëve.

Pas identifikimit të autorëve, shtetasit F. Gj., 32 vjeç dhe A. F., 36 vjeç, të dy banues në Kukës, janë referuar në Prokurori për veprën penale “Pengimi i qarkullimit të mjeteve të transportit”, e parashikuar nga neni 293 i Kodit Penal.

Policia e Kukësit u bën thirrje drejtuesve të automjeteve që të respektojnë rregullat e qarkullimit dhe të shmangin parkimet e gabuara, sidomos në hapësira të dedikuara për këmbësorët. Shkelje të tilla do të ndëshkohen me masa të menjëhershme, si në aspektin penal, ashtu edhe në atë administrativ.