Tentoi të vidhte BMW-n, pronari e zë “mat”, arrestohet 48-vjeçari në Lushnje

Një 48-vjeçar me precedentë të mëparshëm penalë është vënë në pranga nga Policia e Lushnjës, pasi u kap në flagrancë duke tentuar të vidhte një automjet në lagjen “Çlirimi”.

Ngjarja ndodhi mëngjesin e së hënës, kur shtetasi G. K., banues në Tiranë, u konstatua nga vetë pronari i makinës, teksa po manipulonte centralinën e një automjeti tip “BMW”. I alarmuar, pronari lajmëroi menjëherë policinë.

Shërbimet e patrullës që ndodheshin pranë zonës ndërhynë me shpejtësi dhe arrestuan në vend autorin e dyshuar. Gjatë kontrollit, atij iu gjetën mjetet me të cilat po përpiqej të ndërhynte në sistemin elektronik të makinës.

Sipas njoftimit zyrtar, G. K. u arrestua për veprën penale “Vjedhja”, e mbetur në tentativë. Policia po heton nëse ai ka qenë i përfshirë edhe në ngjarje të tjera të ngjashme.

Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Fier, për vijimin e hetimeve.