EMRAT / Shkoi të vrasë personat që i bënë nipin për spital, kapet 47-vjeçari me armë! Çfarë ndodhi në hotel?

Një ngjarje kriminale është parandaluar në Kavajë, pasi një 47-vjeçar u kap i armatosur dhe dyshohet se po shkonte drejt një hoteli në zonën e Malit të Robit, në Golem, për të vrarë personat që kishin dhunuar nipin e tij 18-vjeçar.

Sipas policisë, ngjarja nisi pas një konflikti në një hotel në zonën e Malit të Robit, ku shtetasi Florian Habilaj, së bashku me Arbër Habilaj, Enold Dragoti dhe M. M., kanë dhunuar 18-vjeçarin Genti Nela, i cili punonte si kamerier në lokalin e hotelit dhe është nipi i 47-vjeçarit Melison Nela.

18-vjeçari dyshohet se është dhunuar për shkak të mosdhënies së pagesës për punën e kryer, ndërsa tashmë ndodhet në Spitalin e Kavajës, nën kujdesin e mjekëve.

Melison Nela u arrestua teksa ishte nisur drejt hotelit i armatosur, me qëllim hakmarrjen ndaj personave që kishin dhunuar nipin e tij. Gjatë kontrollit të automjetit në afërsi të hotelit, në një çantë shpine u gjetën një armë zjarri automatik kallashnikov, 3 karikatorë dhe 84 fishekë luftarakë.

Policia bën me dije se pronari i hotelit, kishte “pastruar” vendngjarjen pas konfliktit me të riun, pasi DVR-ja e kamerave të sigurisë ishte hequr dhe kabllot e kamerave ishin prerë, duke tentuar të fshiheshin pamjet e ngjarjes.

Në përfundim të veprimeve të para hetimore, u bë arrestimi në flagrancë i Florian Habilaj, 28 vjeç, dhe Enold Dragoti, 20 vjeç, banues në Kavajë. Gjithashtu u shpall në kërkim Arbër Habilaj, 36 vjeç, ndërsa M. M., 36 vjeç, u procedua në gjendje të lirë.

Në pranga përfundoi edhe Melison Nela, 47 vjeç, i cili u kap i armatosur në automjet, teksa po shkonte drejt hotelit.

Kavajë/Parandalohet një ngjarje e rëndë kriminale.

Me armë zjarri në automjet, po shkonte për të vrarë personat që kishin dhunuar nipin e tij, falë informacionit të marrë në rrugë operative dhe ndërhyrjes në kohë nga shërbimet e Policisë, parandalohet një ngjarje e rëndë kriminale.

Vihet në pranga 47-vjeçari, i cili u kap me armë zjarri automatik, 3 karikatorë dhe 84 fishekë luftarakë.

Arrestohet djali i pronarit të hotelit dhe një shok i tij, shpallet në kërkim djali tjetër i pronarit, ndërsa procedohet në gjendje të lirë dhëndëri i pronarit, të cilët kishin dhunuar 18-vjeçarin, (kamerier në lokalin e hotelit dhe nipi i 47-vjeçarit)

Shërbimet e Komisariatit të Policisë Kavajë dhe të Stacionit të Policisë Golem, pas marrjes së njoftimit për një konflikt në një hotel në zonën e Malit të Robit, Golem, kanë shkuar menjëherë në vendngjarje, duke parandaluar përshkallëzimin e mëtejshëm të konfliktit.

Nga veprimet e para hetimore rezultoi se shtetasi F. H., së bashku me shtetasit A. F., E. D. dhe M. M., kanë dhunuar shtetasin G. N., 18 vjeç, kamerier në lokalin e hotelit, për shkak të mosdhënies së pagesës për punën e kryer. 18-vjeçari ndodhet në Spitalin e Kavajës, nën kujdesin e mjekëve.

Gjatë kryerjes së veprimeve, shërbimet e Policisë kanë marrë informacion në rrugë operative se xhaxhai i 18-vjeçarit, shtetasi M. N., 47 vjeç, banues në Kavajë, i armatosur me armë zjarri, ishte nisur drejt hotelit, me qëllim vrasjen e personave që kishin dhunuar nipin e tij.

Shërbimet e Policisë kanë ndërhyrë menjëherë, duke ndaluar në afërsi të hotelit automjetin që drejtohej nga ky shtetas. Gjatë kontrollit të automjetit, në një çantë shpine, shërbimet e Policisë gjetën një armë zjarri automatik, kallashnikov, 3 karikatorë dhe 84 fishekë luftarakë.

Po nga veprimet hetimore rezultoi se vendngjarja ishte pastruar, DVR-ja e kamerave të sigurisë ishte hequr dhe kabllot ishin prerë.

Në përfundim të veprimeve të para hetimore, u bë arrestimi në flagrancë i shtetasve F. H., 28 vjeç, dhe E. D., 20 vjeç, banues në Kavajë; u shpall në kërkim shtetasi A. F., 36 vjeç; u procedua në gjendje të lirë shtetasi M. M., 36 vjeç, banues në Kavajë.

Gjithashtu u bë arrestimi në flagrancë dhe i shtetasit M. N., 47 vjeç, banues në Kavajë.

Në bashkëpunim me Prokurorinë, vijon puna për dokumentimin e plotë ligjor të kësaj ngjarjeje.

Materialet procedurale i kaluan Prokurorisë për veprime të mëtejshme.