Polici shkoi të takonte të penduarin e drejtësisë, irritohet Nuredin Dumani, dhunon efektivin

Një incident është regjistruar në ambientet e paraburgimit “313” në Tiranë, ku i paraburgosuri Nuredin Dumani dyshohet se është përfshirë në një përplasje fizike me një punonjës policie.

Ngjarja raportohet të ketë ndodhur në mesin e muajit gusht 2026, në sektorin e sigurisë së lartë, ku mbahen persona të përfshirë në procese të rëndësishme penale.

Sipas informacioneve paraprake, konflikti ka ndodhur mes Nuredin Dumanit dhe punonjësit të Drejtorisë për Mbrojtjen e Dëshmitarëve, Rexhep Sina, i cili dyshohet se është goditur me grusht gjatë përplasjes.

Pas incidentit, punonjësi i policisë raportohet se ka bërë kallëzim pranë strukturave të Policisë së Burgjeve. Më pas, Prokuroria e Tiranës ka regjistruar një procedim penal, ku po hetohen veprat penale “Goditja për shkak të detyrës” dhe “Kanosja për shkak të detyrës”.

Rexhep Sina ishte i ngarkuar me detyrën e garantimit të sigurisë fizike të Dumanit, i cili gëzon statusin e bashkëpunëtorit të drejtësisë.

Deri në këto momente, nuk janë bërë të ditura zyrtarisht motivet që çuan në përplasjen mes tyre. Hetimet vijojnë për zbardhjen e plotë të rrethanave dhe të dinamikës së incidentit.