Nesër përcillet në banesën e fundit, sot mbahen pritjet në nderim Artan Lames

Artan Lame, ish-kreu i Agjencisë Shtetërore të Kadastrës, është ndarë nga jeta. Familja e të ndjerit ka njoftuar se pritjet për nder të tij do të mbahen sot, më 26 maj, pranë agjencisë funerale “Alba 2000” në Rrugën e Durrësit, nga ora 10:00 deri në 20:00.

Të martën, më 27 maj, do të zhvillohen homazhe në nder të Lames pranë Akademisë së Shkencave, në sallën “Libri Enciklopedik”, duke nisur nga ora 10:00. Ceremonia e varrimit do të mbahet po atë ditë, në orën 12:00, në varrezat e Sharrës.

Pritjet do të vazhdojnë edhe të mërkurën dhe të enjten, nga ora 09:30 deri në 13:00 paradite dhe nga ora 17:00 deri në 20:30 pasdite.

“Të dashur familjarë e miq, erdhi momenti i ndarjes përfundimtare me njeriun tonë të dashur, ARTAN LAME. Pritjet për nder të tij do të mbahen ditën e hënë, më 26 maj, nga ora 10:00 deri në 20:00, pranë agjencisë funerale “Alba 2000”, Rruga e Durrësit (ish-ambasada jugosllave).

Të martën, më 27 maj, do të zhvillohen homazhet në nderim të Tanit pranë Akademisë së Shkencave, salla “Libri Enciklopedik”, duke filluar nga ora 10:00. Në orën 12.00 do ta përcjellim ne banesën e fundit, në varrezat e Sharrës, Tiranë. Pas ceremonisë, pritjet do të vazhdojnë ditën e mërkurë dhe e enjte, nga ora 09:30 deri në 13:00 dhe nga ora 17:00 deri në 20:30. Pranë agjencisë funerale “Alba 2000”, Rruga e Durrësit (ish-ambasada jugosllave). Me respekt Familja”, njofton familja.

Artan Lame është ndarë nga jeta në moshën 58-vjeçare në Gjermani, pas një ndëhyrje të vështirë në zemër. Ai u nda nga jeta pas daljes nga gjendja e komës. Ai ka mbajtur poste të larta drejtuese në shtetin shqiptar si zëvendësministër apo drejtor i Agjensisë së Kadastrës dhe Legalizimeve.

Lame ishte publicist, opinionist, studiues i historisë shqiptare dhe një veprimtar për mbrojtjen e trashëgimisë kulturore të vendit. I lindur në Tiranë në vitin 1967, me origjinë nga fshati Qytezë i Kolonjës, Artan Lame la gjurmë si pjesë e shoqërisë civile dhe si funksionar publik.