Mbeti i bllokuar në automjet pas aksidentit, i riu nxirret i gjallë nga makina në Durrës

Pas përreth një ore përpjekjeje dhe prerje me sharrë të makinës nga zjarrfikësit për të nxjerrë të riun e identifikuar me inicialet M. Ç, ky i fundit është nxjerrë i gjallë nga automjeti që drejtonte e të cilin e përplasi pranë një karburanti mbrëmjen e sotme në Durrës.

Policia njoftoi se, ky shtetas, 30 vjeç, duke drejtuar automjetin ka humbur kontrollin mbi drejtimin e automjetit dhe për pasojë është përplasur me një shtyllë në një karburant.

Të rinjtë ishin nisur në drejtim të një bari në kryeqytet.

Autovetura e markës Mercedes Benz në të cilën udhëtonin katër të rinj, tre djem dhe një vajzë, ka humbur kontrollin dhe ka hyrë në mjediset e një karburanti, ku është përplasur me një shtyllë.

Makina drejtohej nga 30 vjecari me inicialet M.Ç, ndërkohë që përplasja ka qenë mjaft e fortë, aq sa autovetura është dëmtuar tërësisht.

Tre nga të rinjtë që ndodheshin në autoveturë kanë pësuar dëmtime të shumta.

Në vendngjarje kanë mbërritur autoambulanca të spitalit dhe një automjet i shërbimit zjarrfikës për të bërë të mundur nxjerrjen e të plagosurve nga autovetura.

Ata janë dërguar në spital ku i janë marrë menjëherë për mjekim nga mjekët e urgjencës së spitalit.

Policia mbërriti në vendngjarje dhe po heton shkaqet e aksidentit. Dy nga të plagosurit janë: Klajdi Gecaj dhe Leonora Vrioni.