Kthjellime dhe vranësira në zonat malore, ja parashikimi i motit për ditën e sotme

Moti në vendin tonë ditën e sotme, do ndikohet nga kthjellime dhe alternime vranësirash në zonat malore. MeteoAlb bën me dije se masat ajrore me origjinë Jugore do të diktojnë mot me kthjellime e vranësira të lehta deri në mesditë kur vranësirat bëhen më të dukshme në zonat malore. Edhe pasditja vijon me kthjellime e vranësira kalimtare në Ultësirën Perëndimore ndërsa mbeten të dukshme vranësirat në zonat përgjatë kufirit lindor.

Temperaturat e ajrit do të rriten në mëngjes, por mbeten konstante në mesditë duke luhatur vlerat ekstremale ditore nga 11°C deri në 30°C. Era do fryjë e lehtë dhe mesatare me shpejtësi 30 km/h kryesisht nga drejtimi Jugor duke krijuar në det dallgëzim 3 ballë.