Korçë, katër veterinerë në pranga për matrikullim të bagëtive të kontrabanduara, një në kërkim

Policia e Korçës ka zbuluar dhe goditur një skemë të paligjshme të matrikullimit të bagëtive të kontrabanduara nga Greqia, duke çuar në arrestimin e katër veterinerëve. Operacioni, i koduar “Matrikulli”, u zhvillua nga Seksioni për Hetimin e Krimeve Ekonomike dhe Financiare.

Sipas hetimeve, 120 bagëti të imëta dhe gjedhë janë futur ilegalisht në territorin shqiptar dhe më pas janë legalizuar përmes matrikullimit të manipuluar nga veterinerët e arrestuar.

Një 39-vjeçar është shpallur në kërkim, pasi dyshohet se është organizatori i kontrabandës. Ndërkohë, tre shtetas të tjerë janë proceduar penalisht pasi kishin strehuar kafshët e kontrabanduara në stallat e tyre.

Të gjitha veprimet janë kryer në kundërshtim me urdhrin e Ministrisë së Bujqësisë, e cila ka vendosur ndalim të përkohshëm të lëvizjes së kafshëve të imta për arsye sigurie veterinare.

Policia deklaron se hetimet vijojnë për zbardhjen e plotë të aktivitetit dhe kapjen e personit të shpallur në kërkim.