Kërc’ënohet shteti shqiptar me mesazhe terroriste/ "Kemi vendosur bom'bë, do të shpërthejë brenda dy orëve"

Një e-mail me përmbajtje terroriste dhe kërcënuese për vendosje bombash ka mbërritur mëngjesin e sotëm në adresat elektronike të disa institucioneve në disa qytete të Shqipërisë.

Strukturat e Policisë së Shtetit kanë reaguar menjëherë duke kryer kontrolle të imtësishme në të gjitha godinat e përfshira. Nga verifikimet e kryera deri më tani, ka rezultuar se alarmet ishin rreme dhe nuk është gjetur asnjë lëndë eksplozive.

Aktualisht, Drejtoria për Hetimin e Krimeve Kibernetike dhe Antiterrori po punojnë për të zbuluar adreën elektronike dhe për të identifikuar autorin e këtyre mesazheve.

Policia i ka bërë thirrje qytetarëve të ruajnë qetësinë, duke garantuar se situata është nën kontroll të plotë.

Policia e Shtetit njofton se: "Mëngjesin e sotëm, në adresat elektronike të disa institucioneve në disa qytete të vendit, është dërguar një e-mail nga një adresë ende e paidentifikuar, me përmbajtje kërcënuese dhe terroriste, në të cilin pretendohet se në këto institucione është vendosur një bombë.

Menjëherë pas marrjes së këtij informacioni, strukturat e Policisë së Shtetit po kryejnë të gjitha verifikimet e nevojshme në institucionet e përfshira në këtë kërcënim. Nga kontrollet e kryera deri tani, nuk ka rezultuar të jetë vendosur bombë apo ndonjë lloj tjetër eksplozivi.

Ndërkohë, Drejtoria për Hetimin e Krimeve Kibernetike, në bashkëpunim me Drejtorinë e Antiterrorit dhe agjenci të tjera ligjzbatuese, vijojnë punën intensive për identifikimin e autorit dhe të adresës elektronike nga e cila janë dërguar këto kërcënime.

Policia e Shtetit siguron qytetarët se nuk ka vend për panik dhe se strukturat e saj janë të angazhuara maksimalisht për garantimin e rendit dhe sigurisë publike, si dhe për parandalimin dhe goditjen e paligjshmërive".