Jepnin teste të palicensuara të Covid-19, arrestohen 5 persona në Durrës, një në kërkim

Policia e Durrësit ka arrestuar 5 persona dhe ka shpallur në kërkim një tjetër, pasi në bashkëpunim pajisnin udhëtarët me teste të shpejta për Covid-19, të palicensuara. Sipas policisëm shtetasit u arrestuan në flagrancë, ndërsa mësohet se laboratori i tyre ndodhej në lagjen nr 4 në Durrës.

“DVP Durrës/ Finalizohet operacioni policor i koduar "Laboratori". Operacioni i zhvilluar nga Seksioni i Hetimit të Krimit Ekonomik dhe Financiar në DVP Durrës. Pajisnin udhëtarët me teste të shpejta për "COVID-19", pa qenë të licencuar, arrestohen në flagrancë 5 shtetas, shpallet në kërkim 1 tjetër.

Strukturat e DVP Durrës, në vijim të punës për parandalimin, evidentimin dhe goditjen e paligjshmërisë, pas informacioneve të mara në rrugë operative dhe elektronike, kanë organizuar punën dhe kanë finalizuar operacionin e koduar "Laboratori", në kuadër të të cilit u arrestuan në flagrancë shtetasit:

E. H., 34 vjeçe, banuese në Tiranë, për veprat penale "Kontrabanda me mallrat e tjera", "Fshehja e të ardhurave" dhe "Mashtrimi"; E. A., 24 vjeç, banues në Tiranë, për veprat penale "Fshehja e të ardhurave" dhe "Mashtrimi";

E. Ç., 29 vjeç, banues në Tiranë, për veprat penale "Fshehja e të ardhurave" dhe "Mashtrimi"; A. S., 24 vjeçe, banuese në Durrës, për veprën penale "Moskallëzim krimi"; A. P., 25 vjeçe, banuese në Durrës, për veprën penale "Moskallëzim krimi";

Gjithashtu, u shpall në kërkim shtetasi A. H., 30 vjeç, banues në Tiranë, për veprat penale "Kontrabanda me mallra të tjera", "Fshehja e të ardhurave" dhe "Mashtrimi".

Këta shtetas, në bashkëpunim me njëri-tjetrin, në një laborator në lagjen nr.4, Durrës, duke përfituar nga situata e pandemisë "COVID-19", kanë pajisur me test "Rapid", 483 shtetas të cilët do udhëtonin në drejtim të Italisë, pa qenë të licensuar nga instancat përkatëse, në kundërshtim me Urdhrin datë 23.07.2020 "Për miratimin e procedurës së kryerjes së testimeve molekulare RT-PCR, për SARS CoV-2 dhe njohjes së laboratorëve jopublike për kryerjen e testimit për nevoja administrative".

Materialet i kaluan Prokurorisë së Rrethit Gjyqësor Durrës, për veprime të mëtejshme”, njofton policia.