I mbylli dosjen të dënuarin për prostitucion, KPA largon përfundimisht nga Drejtësia prokuroren e Shkodrës

Kolegji i Posaçëm i Apelimit, KPA njoftoi të martën më 17 dhjetor vendimmarrjen për lënien në fuqi të shkarkimit nga detyra të prokurores së Shkodrës, Edlira Cufi. Vendimi u morë në mënyrë unanime të hënën nga trupi gjykues i KPA i kryesuar nga Mimoza Tasi, me relatore Natasha Mulajn dhe anëtare Albana Shtylla, Ina Rama e Rezarta Schuetz, pas shqyrtimit në dhomë këshillimi të ankimit të kryer nga Cufi kundër vendimarrjes së Komisionit të Pavarur të Kualifikimit për shkarkimin e saj.

Prokurorja e Shkodrës, Edlira Cufi u shkarkua nga detyra prej Komisionit më 17 shkurt 2022, pasi u konkluduan probleme për pasurinë, konstatime të konfliktit të interesit, si dhe se gjendej në kushtet e cënimit të besimit të publikut tek drejtësia duke përdorur dhe udhëtuar me automjete të personave me precedentë penalë.

Edlira Cufi e nisi karrierën e saj në sistemin e drejtësisë në vitin 1995 dhe punoi fillimisht në Prokurorinë e Malësisë së Madhe. Prej më shumë se dy dekadash e ushtroi funksionin e prokurores pranë Prokurorisë së Shkodrës, ku për disa vjet ka qenë dhe në rolin e zëvendësdrejtueses./ BIRN