Fshehu aksidentin e shkaktuar nga e bija duke larguar makinën, e pëson polici në Gjirokastër

Një efektiv policie në Gjirokastër është lënë në arrest shtëpie pas fshehjes së aksidentit automobilistik të shkaktuar nga e bija. Polici TH.M, mësohet se ka larguar mjetin e vajzës së tij nga vendi i ngjarjes, duke prishur provat për aksidentin.

"AMP Vlorë-Gjirokastër ekzekuton vendimin e gjykatës për punonjësin e policisë

Agjencia e Mbikëqyrjes Policore (Rajoni Vlorë-Gjirokastër) ka ekzekutuar urdhrin e Prokurorisë për zbatimin e vendimit të Gjykatës së Shkallës së Parë të Juridiksionit të Përgjithshëm Gjirokastër, e cila ka vendosur masën e sigurisë “Arrest në shtëpi” për punonjësin e policisë Inspektor Th.M., me detyrë Oficer i Patrullës së Përgjithshme/Trup Shërbimi në Postën e Policisë Këlcyrë, Komisariati i Policisë Përmet.

Punonjësi i policisë Th.M. dyshohet për kryerjen e veprave penale “Shpërdorim i detyrës” dhe “Largim nga vendi i aksidentit”, pasi ka kryer veprime të kundraligishme, duke larguar mjetin e vajzës së tij nga vendi i ngjarjes, e cila ishte përfshirë në një aksident automobilistik në rrugën Petran Përmet, duke prishur kështu provat në vendin e ngjarjes."