E ndarë nga 3 fëmijët, përcillet në banesën e fundit Alma Arrazi, në varrim vetëm pak familjarë

Është përcjellë në banesën e fundit Alma Arrazi, e cila u hodh nga lumi Buna bashkë me tre fëmijët e saj, duke gjetur vdekjen. Pasi është dërguar në Durrës sipas kërkesës së babait, ajo është varrosur këtë mesditë në varrezat e reja të qytetit, ndërsa në ceremoni kanë marrë pjesë pak njerëz.

Siç shihet edhe nga pamjet, ceremonia është kryer në heshtje, pa lot e deklarata.

09:55-"Fëmijët le t'i mbajnë", familjarët marrin trupin e pajetë të Almës për ta varrosur në Durrës

Familjarët e Alma Arrazit kanë marrë trupin e pajetë të 39 vjeçares, e cila do të varroset në qytetin e Durrësit.

Familja e nënës e cila u vetëvra dhe mbyti edhe 3 fëmijët e saj nuk ka lejuar që 39 vjeçarja të varroset në Shkodër nga familja e bashkëshortit të saj.

Ndërkohë është kryer edhe autopsia në trupin e pajetë të Alma Arrazit në morgun e spitalit rajonal të Shkodrës dhe nuk ka shenja dhune.

Të afërmit e 39 vjeçares janë larguar tashmë drejt Durrësit duke marrë me vete trupin e pajetë ashtu siç kishin paralajmëruar në deklaratat e dhëna gjatë ditës së sotme edhe pse familja Arrazi janë shfaqur të gatshëm që nusen e shtëpisë ta varrosnin ata duke thënë se kanë të gatshëm katër arkivola dhe duke folur me respekt për të.

Ceremonia mortore për Alma Arrazin do të realizohet në qytetin e Durrësit ndërsa 3 fëmijët e saj do të prehen në varrezat në qytetin e Shkodrës.