Dyshohet se ngacmoi seksualisht vajzën e bashkëjetueses, arrestohet 55-vjeçari në Lezhë

Një ngjarje e rëndë është regjistruar në qytetin e Lezhës, ku një 55-vjeçar është arrestuar nga policia pas dyshimeve se ka ngacmuar seksualisht vajzën 14-vjeçare të bashkëjetueses së tij.

Sipas raportimeve nga vendngjarja, ngjarja ka ndodhur mesnatën e djeshme në një banesë tjetër nga ajo ku jetonin. Burime nga grupi hetimor bëjnë me dije se ka qenë vetë nëna e së miturës ajo që ka konstatuar abuzimin. Ajo ka kapur partnerin e saj në flagrancë, teksa dyshohet se po kryente veprime të turpshme me vajzën.

Menjëherë pas zbulimit të ngjarjes, 55-vjeçari me inicialet B. B. është përpjekur të largohet nga banesa duke dalë nga dritarja, për t’u kthyer më pas në shtëpinë e tij. Nëna së bashku me vajzën kanë bërë kallëzim të menjëhershëm në polici, duke raportuar rastin si ngacmim seksual.

E mitura ka dhënë dëshmi të qëndrueshme dhe të njëjtë që nga momenti i denoncimit, çka ka ndihmuar në ndërhyrjen e menjëhershme të autoriteteve. 55-vjeçari u arrestua menjëherë dhe ndodhet aktualisht në ambientet e paraburgimit në pritje të veprimeve të mëtejshme procedurale.

Policia dhe prokuroria kanë nisur hetimet për të zbardhur plotësisht rrethanat e ngjarjes dhe për të garantuar mbrojtjen e viktimës.