Banorët e fshatit Arapaj reagojnë pas arrestimit të Çlirim Doganit: “Nuk na duket i aftë për krim”

Arrestimi i 55-vjeçarit Çlirim Dogani si bashkëpunëtor në vrasjen e Anesti Ramës ka tronditur komunitetin e fshatit Arapaj, ku ai jetonte prej vitesh. Banorët e zonës e përshkruajnë Doganin si një njeri familjar, të respektuar dhe punëtor, dhe shprehin habinë e tyre për përfshirjen e tij në një ngjarje kriminale kaq serioze.

Manushe Dogani, vajza e xhaxhait të Çlirimit, tha se e njeh prej vitesh dhe e përshkruan si person me integritet familjar dhe profesional. “Çlirimin e njoh shumë mirë, është familjar, ka dy fëmijë. Vajzën e ka të martuar, djalin e ka pamartuar. Me bujqësi janë marrë ata. Për ngjarjen nuk jam në brendësi. Por nuk ma merr mendja kurrë që Çlirimi ta bëjë këtë gjë,” tha ajo.

Një tjetër banor, Fatmir Çalamani, u shpreh se Dogani ka qenë shofer autobusi në zonë dhe gjithmonë ka qenë i saktë dhe pa probleme. “Është djalë i pastër, shumë punëtor dhe nuk ka pasur asnjë problem. Nuk ma merr mendja që të përfshihet në këto,” shtoi ai.

Në pritje të hetimeve të mëtejshme, fshatarët shprehin mosbesimin dhe shqetësimin e tyre për këtë rast të pazakontë që ka tronditur komunitetin e vogël ku jetojnë.