Audi e përplasi për vdekje teksa lëvizte me monopatinë, 13-vjeçari ishte stërnip i At Gjergj Fishtës

Një aksident tragjik i regjistruar në Lezhë i ka marrë jetën Brandon Ndokës, vetëm 13 vjeç, duke tronditur familjen e tij dhe banorët e zonës së Fishtës.

Ngjarja e rëndë ndodhi mbrëmjen e së enjtes në rrugën e vjetër Blinisht–Fishtë. Adoleshenti kishte kaluar mbrëmjen duke luajtur me shokët në një kalçeto dhe po kthehej drejt Fishtës me monopatinë e tij, kur u përplas nga një automjet tip “Audi”.

Goditja rezultoi fatale për 13-vjeçarin, i cili nuk mundi t’u mbijetonte plagëve të marra. Lajmi për vdekjen e tij ka shkaktuar dhimbje të madhe mes familjarëve, miqve dhe bashkëmoshatarëve që e njihnin.

Brandoni ishte djali i vetëm i familjes Ndoka dhe kishte dy motra. Humbja e papritur e tij ka rënduar edhe më shumë tragjedinë për familjen, e cila humbi fëmijën në një moshë kaq të vogël.

13-vjeçari kishte gjithashtu një lidhje të veçantë familjare me një prej emrave më të rëndësishëm të kulturës shqiptare. Ai ishte stërnip i Át Gjergj Fishtës dhe merrte pjesë në aktivitetet që organizoheshin në zonë për të përkujtuar jetën dhe veprën e poetit dhe fratit të njohur françeskan.

Brandoni ishte pjesë e brezit të ri të Fishtës që përfshihej në veprimtaritë kulturore të komunitetit, duke mbajtur gjallë lidhjen me historinë dhe trashëgiminë e kësaj figure të rëndësishme kombëtare.

Vdekja e tij e parakohshme ka lënë në zi prindërit, dy motrat dhe të afërmit, ndërsa dhimbjes së familjes i janë bashkuar edhe miqtë, bashkëmoshatarët dhe komuniteti i zonës.