ATP nxjerr njoftimin, ja 113 familjet që do të dëmshpërblehen për shkak të ndërtimeve informale

Agjencia e Trajtimit të Pronave (ATP) njofton se më datë 11 tetor 2024 ka përfunduar procesin e shqyrtimit të 113 kërkesave për kompensimin e pronarëve të pasurive të paluajtshme, që preken nga ndërtimet informale. Në përputhje me ligjin dhe vendimet e Këshillit të Ministrave, është miratuar shpërndarja e këstit të parë, të dytë, të tretë, të katërt dhe të pestë, duke mbuluar 70% të vlerës totale të miratuar për këto pasuri.

Procesi i shqyrtimit dhe shpërndarjes së fondit është bazuar në ligjin nr. 9482, datë 03.04.2006, “Për legalizimin, urbanizimin dhe integrimin e ndërtimeve pa leje”, si dhe në Vendimin e Këshillit të Ministrave nr. 383, datë 19.05.2010, të ndryshuar, i cili përcakton procedurat dhe kriteret për kompensimin financiar të pronarëve të pasurive të prekura. Pas përfundimit të verifikimeve nga ATP, u konstatua se të gjitha 113 kërkesat ishin në përputhje me kriteret e përcaktuara nga legjislacioni.

Totali i fondit financiar të shpërndarë për këto kërkesa është 247,062,129.76 lekë. Lista e plotë e pasurive të kompensuara dhe të dhënat e subjekteve përfitues janë bashkëlidhur këtij njoftimi.

ATP njofton se vlerat përkatëse për secilin përfitues do të jenë të disponueshme në llogaritë e tyre bankare në ditët në vijim, pas përfundimit të procedurave të transfertave bankare. Subjektet e interesuara mund të kontaktojnë ATP për më shumë informacion mbi gjendjen e llogarive të tyre.