“As uji i detit s’ka kaq shumë kripë” – Qytetarja denoncon ujin e ambalazhuar me kripë në një resort të jugut

Një përvojë aspak e këndshme është ndarë nga një qytetare, e cila gjatë një mëngjesi pushimi në resortin e njohur “Drymades Inn” është përballur me një situatë të pazakontë: ujë i ambalazhuar me kripë.

Sipas denoncimit të saj, teksa kishte porositur kafen dhe një shishe ujë të markës “Lajthiza”, ajo mbeti e shokuar nga fakti që uji ishte i kripur në mënyrë të ekzagjeruar. “Shishja ishte e pahapur, por kur e hapa, as uji i detit nuk kishte kaq shumë kripë”, shprehet qytetarja, e cila ka ndarë edhe një video nga momenti kur iu servir porosia bashkë me familjen.

Ende më shqetësues është fakti se dy kamarierë, pasi provuan vetë ujin, e konfirmuan problemin duke pohuar: “Nuk është hera e parë që ndodh.”

Ngjarja ngre pikëpyetje serioze mbi sigurinë e ujit të ambalazhuar në treg dhe kontrollin e cilësisë nga prodhuesit dhe distributoret.

“Kujdes me atë që pini,” përfundon qytetarja në mesazhin e saj, duke paralajmëruar pushuesit e tjerë se edhe uji në shishe mund të mos jetë i sigurt.