Apeli i Epidemiologut Alimehmeti: Maskat në rrugë jo të detyrueshme, hiqni...

Epidemiologët i rekomandojnë Komitetit të Ekspertëve, heqjen e disa masave kufizuese anti-Covid. Për Ilir Alimehmetin ka ardhur koha që maskat të mos jenë të detyrueshme në rrugë ndërsa propozon heqjen e orës policore, veçanërisht për lëvizjen e qytetarëve.

Ky sugjerim vjen në një situatë të përmirësuar dhe kur shifrat e infektimeve kanë rënë ndjeshëm. Por, Alimehmeti shpjegon se heqja e maskës duhet të bëhet ne ambiente të hapura dhe aty ku nuk ka grumbullime njerëzish. Në të kundërt, qytetarët duhet të tregohen të kujdesshëm për mbajtjen e distancës apo maskës.

24 orët e fundit shënuan pozitivitetin më të ulët të infektimeve në raport me testimet e kryera. Kjo situatë ndjeshëm e përmirësuar thotë Alimehmeti, vjen pasi një pjesë e konsiderushme e kanë kaluar virusin ndërsa të tjerë po vaksinohen.

Ndërkohë dy ditë më parë shefja për sëmundjet infektive, Silva Bino u shpreh kritike në lidhje me mosmbajtjen e maskës dhe në ambiente të hapura, veçanërisht aty ku ka grumbullime. Sipas Binos, kjo mund të çojë në infektimin e personave ende të paprekura nga virusi. Ndërkaq specialistë po monitorojnë edhe për dy javë të tjera efektet e grumbullimeve dhe shkeljeve të masave që ndodhën ditën e zgjedhjeve. /A2cnn