Aksidentoi për vdekje 59-vjeçarin dhe u largua nga vendngjarja, arrestohet 24-vjeçari në Mat

Policia e Matit ka bërë të mundur arrestimin e 24-vjeçarit, pasi një ditë më parë aksidentoi për vdekje një kalimtar dhe më pas u largua. Blutë bëjnë me dije se një ditë më parë, rreth orës 12.00, në qytetin e Burrelit, shtetasi J. Gj., duke drejtuar automjetin e tij, ka aksidentuar këmbësorin shtetasin H. R., 59 vjeç, i cili për pasojë ka humbur jetën në spital.

“Autori pas aksidentit u largua nga vendi i ngjarjes, por pas ndjekjes nga Policia, u bë kapja dhe shoqërimi i tij në Komisariat. Në përfundim të veprimeve të para hetimore nga specialistët e Policisë Rrugore u bë arrestimi i shtetasit J. Gj., 24 vjeç, banues në Mat. Materialet procedurale i kaluan Prokurorisë Mat për veprime të mëtejshme”, njofton policia.