Aksident i rëndë rrugor në Rrugën e Arbrit, mbeten dy të plagosur

Një aksident i rëndë rrugor është regjistruar pasditen e së dielës në segmentin e Rrugës së Arbrit, pranë urës së Gjoricës në Dibër, ku dy automjete janë përplasur kokë më kokë.

Si pasojë e përplasjes, kanë mbetur të plagosur drejtuesit e të dy mjeteve, të cilët janë transportuar me urgjencë në Spitalin e Bulqizës për të marrë ndihmën mjekësore të nevojshme. Ende nuk ka informacion zyrtar mbi gjendjen e tyre shëndetësore.

Policia ka mbërritur menjëherë në vendin e ngjarjes dhe ka nisur hetimet për të zbardhur shkaqet dhe rrethanat e aksidentit. Paraprakisht dyshohet se shpejtësia e lartë dhe manovrat e pakujdesshme mund të kenë qenë shkaktarët kryesorë.

Rruga e Arbrit, ndonëse një nga projektet më të rëndësishme infrastrukturore të viteve të fundit, vazhdon të jetë problematike në disa segmente, ku mungojnë sinjalistika e plotë dhe masat e duhura të sigurisë rrugore.