8 vite pas divorcit të bujshëm, Jonida Maliqi padit ish-bashkëshortin: Nuk paguan detyrimet fianciare

Këngëtarja Jonida Maliqi i është rikthyer dyerve të gjykatës 8 vite pas divorcit të bujshëm nga ish-bashkëshorti i saj, Gent Prizreni. Ajo është parë në ambjentet e Gjykatës së Tiranës shoqëruar nga avokati i saj.

BalkanWeb ka raportuar se Maliqi ka paditur ish-bashkëshortin pasi ky i fundit nuk i është përmbajtur detyrimeve ekonomike ndaj fëmijës së tyre, Dan. Në kërkesëpadi ajo ka deklaruar se biznesmeni nuk ka paguar pensionin ushqimor për djalin, përkatësisht detyrimin e ngarkuar nga gjykata me vlerë 2 mijë euro në muaj.

Gjithashtu në kërkesëpadi këngëtarja ka pasqyruar disa prona të Gent Prizrenit që ai i dispononte nga koha që është kryer divorci, duke theksuar se ai ka qenë pronar ose bashkëpronar të disa pasurive të paluajtshme në disa zona të Shqipërisë, me vlerë rreth 3-4 milionë euro.

Një tjetër konflikt mes tyre është bërë dhe shtëpia që Jonida banon sot me djalin Dan. Kjo banesë rezulton “banesë bashkëshortore” por në padinë e paraqitur në gjykatë ajo ka thënë se biznesmeni nuk i është përmbajtur marrëveshjes për të blerë një apartament të ri për të dhe djalin.