Aksion kundër kontrabandës në veri të Kosovës, sekuestrohen 22 automjete dhe mallra mbi 200 mijë euro

Autoritetet e Kosovës kanë sekuestruar 22 automjete dhe mallra me vlerë doganore mbi 200 mijë euro gjatë një operacioni të zhvilluar në veri të vendit, në kuadër të një hetimi disamujor për kontrabandë të dyshuar nga Serbia. Për këtë çështje, dhjetë persona janë nën hetim.

Sipas Prokurorisë së Mitrovicës, aksioni u zhvillua në bashkëpunim me Policinë e Kosovës, Doganën dhe Agjencinë e Kosovës për Inteligjencë.

Hetimet nisën në prill të këtij viti dhe çuan në identifikimin e rrugëve ilegale që dyshohet se përdoreshin për futjen e mallrave nga Serbia në Kosovë.

Gjatë hetimeve, autoritetet identifikuan edhe objektet ku mallrat dyshohet se shkarkoheshin, ruheshin dhe më pas shpërndaheshin në treg.

Sipas Prokurorisë, automjetet e përdorura për transport ishin në shumicën e rasteve të modifikuara, duke u hequr sediljet e pasme për të krijuar më shumë hapësirë për mallrat.