Vritet me thikë 26-vjeçarja/ Personi i dyshuar për vrasjen fatale lirohet me kusht

Një 26-vjeçare është vrarë me thikë në një zonë periferike të Mançesterit ditën e enjte në zonën Newton Heath. 

Vajza e cila u gjet me plagë fatale ditën e enjte quhej Alisha ndërsa 25-vjeçari i arrestuar fillimisht nën dyshimin për vrasje është liruar me kusht, në pritje të hetimeve të mëtejshme.   

Policia u thirr në Dorking Avenue rreth orës 02:00 të mëngjesit, pasi banorët raportuan se kishin dëgjuar britma dhe të bërtitura jashtë banesave të tyre.

Sipas dëshmitarëve, në vendngjarje u pa një automjet që u përplas me forcë me një furgon policie, ndërsa një burrë u nxor nga makina. Rrethanat e plota të vdekjes së 26-vjeçares mbeten ende të paqarta. 

Pas lajmit tragjik, rrjetet sociale janë mbushur me mesazhe dhimbjeje dhe fotografi të Alishës. Miqtë e saj e kanë përshkruar si një vajzë të dashur, plot humor dhe me një zemër të madhe.

Mikja e saj e ngushtë, Aimee Quinn, shkroi në Facebook se nuk arrin ta besojë humbjen dhe se nuk e di se si do ta përballojë jetën pa bisedat e përditshme me të. Ajo kujtoi të qeshurat, udhëtimet dhe planet që kishin bërë së bashku për të eksploruar botën, duke theksuar se Alisha ishte për të më shumë se një shoqe, një motër e vërtetë.

Një tjetër mike e përshkroi Alishën si një nga njerëzit më të sjellshëm dhe më gazmorë që kishte njohur, duke thënë se do të ishte gjithmonë mirënjohëse që kishte pasur mundësinë ta njihte.

Edhe Carris Mallon, një tjetër mike e saj, e kujtoi me fjalë të ndjera, duke shkruar se nuk e di se si do të jetojë pa të dhe se miqësia e tyre do të mbetet e përjetshme.

Inspektori i lartë i detektivëve, Justin Bryant, i cili drejton hetimin, deklaroi se autoritetet po punojnë intensivisht për të identifikuar dhe lokalizuar të gjithë personat që mund të kenë qenë të përfshirë në vdekjen e Alishës. Ai theksoi se lirimi me kusht i 25-vjeçarit nuk nënkupton përfundimin e hetimeve dhe u bëri thirrje qytetarëve të mos spekulojnë për rrethanat e ngjarjes.

Sipas tij, përhapja e informacioneve të pakonfirmuara mund të pengojë hetimin dhe të shkaktojë vuajtje të mëtejshme për familjen e viktimës. Familja e Alisha Samuels ka kërkuar privatësi gjatë kësaj periudhe të vështirë, ndërsa policia u ka bërë thirrje të gjithë personave që kanë informacion për ngjarjen të kontaktojnë autoritetet