VIDEO/ Sh*ërthim i fuqishëm në një parking, kamioni shpërthen në f*akë

Një shpërthim i fuqishëm në një parking në qytetin e Billings, në shtetin Montana të SHBA-së, ka shkaktuar momente paniku mes punonjësve dhe klientëve të bizneseve përreth. Një kamion që transportonte pajisje për përzierjen e asfaltit u përfshi nga flakët dhe më pas shpërtheu, duke krijuar një top të madh zjarri.

Ngjarja ndodhi më 15 tetor, rreth orës 13:00, në një kompleks tregtar në King Avenue West. Zjarri u përhap me shpejtësi në pajisjet e tërhequra nga kamioni, përpara se të ndodhte shpërthimi i fuqishëm, i cili shkaktoi edhe dëme materiale në një biznes aty pranë.

Pamjet e kamerave të sigurisë dhe të dëshmitarëve tregojnë momentin e shpërthimit, ndërsa forca e tij ishte aq e madhe sa hapi me vrull dyert prej xhami të biznesit Bullfrog Spas.

Një punonjës i biznesit, Taylor Bromgard, rrëfeu për televizionin lokal KTVQ se fillimisht kishte vënë re atë që i ishte dukur si mjegull, por më pas kuptoi se bëhej fjalë për tym. Ai tentoi të dokumentonte ngjarjen dhe mendoi të ndërhynte me një tub uji, por flakët u përhapën me shpejtësi.

Fatmirësisht, nga incidenti nuk pati persona të lënduar. Sipas Departamentit të Zjarrfikësve të Billings, në momentin e shpërthimit nuk kishte njeri brenda kamionit apo pranë tij.

Hetimet paraprake sugjerojnë se shpërthimi mund të jetë shkaktuar nga një bombol propani e vendosur në pjesën e pasme të automjetit. Autoritetet e kanë cilësuar zjarrin si aksidental.