Të rinjtë te Kryeministria rrëzojnë stolat e gurëve të Ramës: Nuk ka dialog, jep dorëheqjen!

Pas seancës së tensionuar, deputetët janë larguar tashmë nga Kuvendi, duke i hapur rrugë kështu mbajtjes së protestës së dhjetë të studentëve dhe pedagogëve të tyre tashmë.

Pasi u grumbulluan në sheshin tek “Partizani i Panjohur”, protestuesit marshuan përgjatë Rrugës së Elbasanit, ku ndalesa e parë ishte pikërisht hyrja tek Kuvendi i Shqipërisë.

Dhe pasi qëndruan për më shumë se 1 orë aty, protestuesit vendosën të zhvendoseshin në bulevardin “Dëshmorët e Kombit”.

Me të mbërritur te sheshi para Kryeministrisë, protestuesit i kthyen menjëherë përgjigje kryeministrit Edi Rama i cili i ftoi të uleshin mbi gurë për të vendosur një “Dialog” mes palëve.

Studentët i rrëzuan këto stola duke mos hequr dorë nga ajo që është dhe kryefjala e protestës së tyre “Dorëheqje e kryeministrit Edi Rama”, pasi për ta tashmë nuk ka mbetur asgjë për t’u biseduar apo negociuar.