Brazili i jep LAMTUMIRËN Kupës së Botës: eliminimi i gjashtë radhazi kundër Evropës…

Brazili vijon të mbetet peng i “makthit evropian” në Kupat e Botës, një histori që nisi pas triumfit të madh në vitin 2002 dhe që vazhdon ende sot.

“Seleção” fitoi titullin e pestë botëror në Kore të Jugut dhe Japoni, në atë që konsiderohet edhe ekipi i fundit i madh brazilian në skenën globale. Që prej atij momenti, Brazili nuk ka arritur më të eliminojë asnjë përfaqësuese evropiane në fazat me eliminim direkt të Botërorit.

Në Gjermani 2006, skuadra e mbushur me kampionët e vitit 2002 dominoi grupin dhe mposhti Ganën 3-0 në 1/8-at, por u ndal në çerekfinale nga Franca e Zinedine Zidane me rezultatin 1-0.

Katër vite më vonë në Afrikën e Jugut, Brazili i drejtuar nga Dunga përsëriti të njëjtin skenar. Pas suksesit 3-0 ndaj Kilit, “Seleção” u eliminua nga Holanda, që përmbysi rezultatin dhe fitoi 2-1 në çerekfinale.

Goditja më e rëndë erdhi në Botërorin e vitit 2014, të zhvilluar në Brazil. Me Neymar si simbolin e shpresës, vendasit arritën deri në gjysmëfinale, por përballja me Gjermaninë u kthye në një katastrofë historike. Pa Neymar dhe Thiago Silva, Brazili u turpërua 7-1 në një nga humbjet më të rënda në historinë e futbollit.

Në Rusi 2018, skuadra e Tites dukej më e balancuar dhe më e fortë, por Belgjika e “brezit të artë” i dha fund ëndrrës së brazilianëve në çerekfinale, duke fituar 2-1.

Edhe në Katar 2022, me Neymar, Vinícius Júnior, Richarlison dhe Raphinha në formacion, Brazili konsiderohej ndër favoritët kryesorë. Megjithatë, historia u përsërit sërish. Kroacia rezistoi deri në penallti dhe eliminoi “Seleção” në çerekfinale.

Tashmë, edhe eliminimi i fundit nga Norvegjia vetëm sa e thellon krizën e Brazilit ndaj skuadrave evropiane. Nëse humbjet e para erdhën kundër gjigantëve historikë si Franca, Holanda apo Gjermania, vitet e fundit Brazili është ndalur edhe nga kombëtare me më pak traditë botërore, duke treguar se dominimi i dikurshëm është zbehur ndjeshëm.