Dua Lipa rikthehet në Sanremo, jo vetëm si e ftuar por edhe në rolin e bashkë-prezantueses

Dua Lipa jo vetëm që do të jetë e ftuar në Sanremo 2027, por do të jetë edhe bashkë-prezantuese e një prej netëve të festivalit. Sipas Adnkronos, kjo është marrëveshja e madhe për të cilën Stefano De Martino po punon për debutimin e tij si drejtor artistik dhe prezantues i festivalit. Negociatat thuhet se kanë filluar tashmë.  

Artistja shqiptare me famë botërore ka qenë edhe më parë e ftuar në Sanremo  - në vitin 2020, gjatë drejtimit të Amadeus, ku performoi hitin “Don’t Start Now” në një spektakël të shoqëruar nga tetë balerina.

Ende nuk dihet se për cilën mbrëmje po synohet prania e saj. Një mundësi do të ishte nata e parë ose finalja, por nuk përjashtohet as nata e re “Performance”, e lidhur me përzgjedhjen e përfaqësuesit italian në Eurovision. 

Një tjetër faktor që duhet të merret në konsideratë është axhenda e këngëtares. Për momentin, Dua Lipa nuk ka të planifikuara koncerte gjatë datave të Sanremos, i cili do të zhvillohet nga 16 deri më 20 shkurt 2027 në Teatrin Ariston. Megjithatë, deri në festival kanë mbetur ende disa muaj dhe marrëveshja përfundimtare nuk është konfirmuar zyrtarisht.

Por Dua Lipa nuk është i vetmi emër që po qarkullon rreth Sanremos 2027. Në javët e fundit është përfolur edhe Maria De Filippi si bashkëprezantuese e një prej netëve. Prania e saj do të kishte një domethënie të veçantë për De Martinon, pasi pikërisht “Amici”, programi i drejtuar nga De Filippi, ishte vendi ku ai hodhi hapat e parë në televizion në vitin 2009.