“Të kanë lënduar?”/ Rama flet për kritikat e BE-së për Sazanin: E kam marrë personale, e bëj me pasion këtë punë

Kryeministri Edi Rama ka dhënë një intervistë për televizionin britanik Channel 4, ku është përfshirë në një debat me gazetaren lidhur me shqetësimet e ngritura nga Komisioni Europian për një projekt të caktuar.

Gjatë intervistës, gazetarja e ka ballafaquar kreun e qeverisë shqiptare me qëndrimin e Brukselit, duke theksuar se institucionet europiane janë të shqetësuara për pasojat e projektit. Përgjigja e Ramës ka qenë e prerë, duke ftuar zyrtarët europianë që të qetësohen dhe të bazohen te faktet e jo te emocionet apo parashikimet katastrofike.

Lindsey Hilsum:: Komisioni Europian ka shprehur shqetësim dhe, sigurisht, anëtarësimi i Shqipërisë në Bashkimin Europian është shumë i rëndësishëm për ju. Komisioni është i shqetësuar për ligjet mjedisore dhe gjithashtu për ndryshimet në ligjin mjedisor të vitit 2024, i cili krijon një lloj përjashtimi për investimet strategjike. A mendoni se mund ta rishikoni edhe një herë këtë?

Edi Rama: Është mirë, madje shumë mirë, që Komisioni është i shqetësuar. Dhe nuk mund të ishte ndryshe. Ne jemi në negociata për t’u bërë anëtarë të Bashkimit Europian. Prandaj, vetë ideja se mund të ecim përpara me një projekt që nuk përputhet me standardet europiane është e papranueshme. Ajo që po them është: qetësohuni, flisni për faktet, komentoni faktet dhe shikoni faktet. Mos u nxitoni të thoni se gjithçka është katastrofike.

Lindsey Hilsum:: Duket sikur ju kanë lënduar personalisht këto akuza.

Edi Rama: Jo, jo. Nuk jam i lënduar.

Lindsey Hilsum:: Megjithatë, duket se i merrni shumë personalisht. Është interesante.

Edi Rama: Nuk jam i lënduar.

Lindsey Hilsum:: Sepse duket se i merrni shumë personalisht.

Edi Rama: Dëgjoni, gjithçka është personale. Kushdo që e bën punën e tij ose të saj me pasion, e përjeton personalisht. Por nuk jam i lënduar. Kjo më ka ndihmuar.

Siç ju thashë më parë, për mua protesta e qershorit, jo kjo e tanishmja, ishte njëkohësisht një konfirmim se vendi është në një nivel tjetër dhe, nga ana tjetër, një pasqyrë shumë e qartë për të parë se mbi çfarë duhet të reflektojmë.