Meta: Qytetarët e Kosovës meritojnë sa më parë liberalizimin e vizave me Bashkimin Europian

Presidenti i Republikës, Ilir Meta shprehet se qytetarët e Kosovës meritojnë sa më parë liberalizimin e vizave me Bashkimin Europian, duke theksuar se të njëjtin qëndrim i ka shprehur edhe Presidenti i Sllovenisë, Borut Pahor.

Po ashtu Kreu i Shtetit thotë se me homologun slloven kanë diskutuar edhe për rëndësinë e vijimit të dialogut Kosovë-Serbi për arritjen e një marrëveshjeje të qëndrueshme dhe reciprokisht të pranueshme nga të dyja palët, që do të përshpejtonte proceset integruese të këtyre vendeve.

Postimi i plotë:

Qytetarët e Kosovës meritojnë sa më parë liberalizimin e vizave me Bashkimin Europian.

Të njëjtin qëndrim më shprehu sot edhe Presidenti i Sllovenisë, Borut Pahor, me të cilin gjithashtu nënvizuam rëndësinë e vijimit të dialogut Kosovë-Serbi për arritjen e një marrëveshjeje të qëndrueshme dhe reciprokisht të pranueshme nga të dyja palët, që do të përshpejtonte proceset integruese të këtyre vendeve.

E ardhmja e vendeve të Ballkanit Perëndimor nuk është ndryshimi i kufijve por heqja e tyre si në vetë Bashkimin Europian, nëpërmjet bashkëpunimit më të ngushtë rajonal dhe të distancimit nga e kaluara e hidhur.