BKH bastis vilën në Gjirin e Lalzit, kërkohen prova për Metën dhe Kryemadhin

Vila në zonën e Gjirit të Lalzit, në pronësi të çiftit Meta-Kryemadhi, është duke u kontrolluar nga agjentët e Byrosë Kombëtare të Hetimit. Me urdhrin e SPAK në dorë, ata kanë mësyrë në ambientet e vilës së shumëpërfolur dhe po kërkojnë për prova.

Muaj më parë çifti nisi procedurat e divorcit dhe aktorë të njohur publikë thanë atë kohë se gjithçka bëhej vetëm për procesin gjyqësor ndaj tyre. Ilir Meta u largua nga shtëpia dhe jetoi për muaj me radhë te një hotel te Liqeni i Thatë.

Megjithtë, vila në zonën bregdetare të Lalëzit ka qenë prej vitesh në qendër të investigimeve mediatike për luksin e shfrenuar dhe siç duket tashmë është edhe në vëmendje të SPAK, pasi agjentët e Byrosë Kombëtare kanë mësyrë atje duke kontrolluar çdo cep.

"Po ushtrohet kontroll në një vilë në Gjirin e Lalzit. Aty po kërkohen prova për veprimtarinë e Ilir Metës. Kontrollet po bëhen me urdhër të GJKKO-së", është shprehur gazetarja Klodiana Lala.

Ish-presidenti i vendit është akuzuar publikisht dhe ka qenë nën hetim nga SPAK për disa akuza, që lidhen me financime të paligjshme jashtë vendit, dosjen CEZ-DIA dhe të tjera çështje. Madje, Ilir Meta është paraqitur në SPAK përgjatë viteve më shumë se dy herë.