Berisha kërkoi heqjen e masës së “arrestit në shtëpi”, GJKKO shtyn seancën për ish-kryeministrin

Gjykata e Posaçme ka shtyrë seancën për ish-kryeministrin, Sali Berisha,  i cili ka bërë kërkesë për heqjen e masës së sigurisë “arrest në shtëpi”. Mësohet se shkak për shtyerjen e seancës është bërë mungesa e prokurorëve të SPAK.

Seanca e radhës është caktuar të mbahet me datën 8 prill në orën 13:00.

Përmes një shkrese, dy prokuroret e SPAK, vunë në dijeni gjykatën se nuk mund të paraqiteshin në seancë për arsye objektive. Ashtu si në çdo seancë, avokatët e Berishës, Sokol Mëngjesi dhe Genc Gjokutaj u paraqitën në ambientet e GJKKO.

Kujtojmë se Berisha ka bërë disa herë kërkesë për ndryshim të masës së sigurisë, por ajo është refuzuar. Po ashtu ai ka kërkuar që të jetë i pranishëm në seancat plenare, si e drejtë e tij për të përfaqësuar interesin e qytetarëve që e kanë zgjedhur, në Kuvend. Pavarësisht pretendimeve të tij, GJKKO ka refuzuar kërkesat.

Ish-kryeminsitri ndodhet në “arrest shtëpie” që prej datës, 30 dhjetor 2023.