Basha: Do të ndërtojmë një Platformë Qytetare për Demokracinë, t'i japim fund kapjes së shtetit

Kreu i Partisë Demokratike, Lulzim Basha ka folur pas mbledhjes së Këshillit Kombëtar.

Përmes një statusi në Facebook, Basha shprehet se në PD do të ndërtohet një platformë qytetare për Demokracinë , për zgjedhje të lira, për ndryshime kushtetuese që garantojnë ndarjen dhe balancimin e pushteteve, që sipas tij përmirësojnë përfaqësimin politik dhe që reformojnë ndarjen territoriale dhe demokratizojnë pushtetin vendor.

Deklarata e Bashës:

E sotmja është një ditë e rëndësishme për Partinë Demokratike. Demokratet dhe demokratët i dhanë besimin Kryesisë dhe ekipit të ri për të çuar përpara një sfidë që nuk është thjesht partiake, por kombëtare, atë për kthimin e demokracisë dhe legjitimitetit në vend.

Hapja dhe bashkëpunimi i Partisë Demokratike me shoqërinë do të jenë në qendër të reformimit tonë të brendshëm dhe bashkë me shumicën e shqiptarëve që kërkojnë ndryshim, do të ndërtojmë një Platformë Qytetare për Demokracinë, për zgjedhje të lira, për ndryshime kushtetuese që garantojnë ndarjen dhe balancimin e pushteteve, që përmirësojnë përfaqësimin politik, që reformojnë ndarjen territoriale dhe demokratizojnë pushtetin vendor. Vetëm kështu mund t’i japim fund kapjes së shtetit dhe sundimit të kësaj pakice të korruptuar e ta bëjmë Shqipërinë një vend të jetueshëm për familjet shqiptare.