Një i pastrehë ofendon Erdoganin për të gjetur strehim dhe ushqim në burg: Nuk kam ku të shkoj

Një burrë i pastrehë në jug të Turqisë ofendoi presidentin Recep Tayyip Erdoğan me qëllim që të gjente strehim dhe ushqim në burg, raportojnë mediat turke.

«Nuk kam ku të shkoj. Fli ja nëpër deponi mbeturinash. Për këtë arsye përfundova këtu», deklaroi 66-vjeçari gjatë marrjes në pyetje, sipas faqes së gazetës Sözcü, e cila është pranë opozitës.

Burri u arrestua në Alanya, në provincën jugore të Antalias, për «fyerje të presidentit të Republikës». Ai ishte arrestuar edhe tri herë më parë, por çdo herë ishte liruar. Megjithatë, përpjekja e tij e katërt rezultoi e suksesshme.

Numri i çështjeve gjyqësore për «fyerje të presidentit» është rritur ndjeshëm që kur Turqia kaloi në sistemin presidencial në vitin 2018.

Sipas statistikave të Ministrisë së Drejtësisë, numri i përgjithshëm i hetimeve të nisura për «vepra penale kundër simboleve të sovranitetit shtetëror dhe dinjitetit të institucioneve të tij», përfshirë fyerjen e kreut të shtetit, arriti në 83 mijë raste gjatë periudhës 2016–fundi i vitit 2025.

Gazeta Sözcü thekson gjithashtu se numri i hetimeve për «fyerje të presidentit» është rritur ndjeshëm gjatë presidencës së Erdoganit, krahasuar me paraardhësit e tij.

Gazetarët, aktivistët, politikanët dhe madje edhe përdoruesit e zakonshëm të internetit bëhen rregullisht objekt i akuzave të tilla, të cilat dënohen me burgim nga një deri në katër vjet.