Vëllai i Albulena Haxhiut, në gjendje të dehur, ka tentuar të sulmojë kamarierët-Nga spital përfundoi në polici

Kastriot Haxhiu, vëllai i ushtrueses së detyrës së presidentes, Albulena Haxhiu, është përfshirë në një incident.

Sipas Paparacit, ai në gjendje të dehur ka shkuar në një lokal në qendër të Prishtinës, në zonën e njohur si “kafet e rakisë”, dhe ka tentuar t’i sulmojë fizikisht punëtorët e një kafiterie, të cilët i janë shmangur një situate të tillë.

Pas ngjarjes, Haxhiu, i cili është edhe punëtor i Telekomit, është larguar nga vendi i ngjarjes dhe është gjetur i shtrirë në tokë pak metra larg lokalit në fjalë, në rrugën “Qamil Rexha”. Ai është transferuar në Qendrën Klinike Universitare të Kosovës.

Pasi e kishte marrë veten, Haxhiu ishte munduar ta mbulojë rastin duke u paraqitur si viktimë, mirëpo pas ekzaminimeve të kryera në QKUK, ka rezultuar se nuk ka lëndime nga ndonjë sulm fizik.

Përpos ekzaminimeve mjekësore, të njëjtit i është bërë edhe alkool-testi, i cili ka rezultuar pozitiv, raporton Paparaci.

Pas kësaj, pronari i lokalit ku më parë kishte qenë Haxhiu është thirrur në stacionin e Policisë në Prishtinë për të dhënë deklaratë.

Ai ka deklaruar se vëllai i kryeparlamentares kishte tentuar t’i sulmojë djalin, nipin dhe një punëtor tjetër.

Pas kësaj deklarate dhe dëshmive të dëshmitarëve, Haxhiu e ka pranuar se nuk është sulmuar, por është rrëzuar.

Kësisoj, të dy palët, në prani të avokatëve, nuk e kanë çuar rastin më tej./Insajder