Shpërthim i fortë në veri të Kosovës

Policia e Kosovës ka konfirmuar se të dielën ka ndodhur një shpërthim në pjesën veriore të vendit, në afërsi të Liqenit të Ujmanit.

Zëvendësdrejtori i Policisë së Kosovës për pjesën veriore, Veton Elshani, ka thënë se nuk ka të lënduar, por vetëm dëme materiale në dy makina. Ai nuk e ka specifikuar saktë se për çfarë shpërthimi bëhet fjalë.

"Ka pasur një shpërthim, janë dëmtuar dy vetura. Nuk raportohet për të lënduar. Policia po merret me rastin", ka thënë Elshani.

Policia e Kosovës shihet përgjatë rrugës Mitrovicë-Zubin Potok, që çon te liqeni i Ujmanit.

Elshani ka thënë se policia është duke u marrë me rastin. Qytetarë të zonës janë parë në javët e fundit duke u freskuar afër liqenit, pas temperaturave të larta, gati 40 gradë Celsius.